Síðan síðast þá er ég búin að fara í 2 próf, það seinna núna í kvöld og það gekk bara ágætlega í þeim báðum.

Þegar ég gekk út úr prófinu áðan var ég bara frekar ánægð með sjálfa mig. Gekk spert eins og hani og hugsaði SKO MIG. En svo þurftu þeir endilega að gefa manni lausnirnar í dyrunum. Ekki lengur svo ánægð með mig en þetta gekk samt ágætlega. Gerði annað dæmið alveg rétt en í hinu gleymdi ég að deila með 3 sem hafði keðjuverkandi áhrif út dæmið. Nú er bara að bíða og sjá hvernig kennarinn gefur fyrir.

Það er annars búið að vera frekar rólegt hjá okkur. Við höfum bara verið að læra, horfa á sjónvarpið, læra og já læra. Þar sem að ég er Íslendingur og dóttir föður míns þá er ekki úr vegi að ræða aðeins um veðrið. Það var eins og slökkt á væri hitanum allt í einu. Það var sól og rúmlega 20 stiga hiti einn daginn og síðan var það bara allt í einu búið og ógeðslega kalt. Samkvæmt veðurspánni eru 10-14 gráður úti þessa dagana en ég get sagt ykkur að það er kjaftæði. Allavega er þá rakinn að hafa mikil áhrif því að heima þarf maður ekki að vera með vettlinga í 10 stiga hita.

Við komumst líka að því að við ákveðum ekki sjálf hvenær við kyndum kofann. Það er víst orkufyrirtækið sem ákveður hvenær sé hentugt að byrja að kynda allt húsið. Það var skítkalt hérna inni í tæpa viku og ég sat með sultardropa í flíspeysu og lopapeysu við lærdóminn. Við vissum ekki af þessu með hitann svo við reyndum fyrst að kveikja á ofnunum með því að skrúfa frá þeim öllum. Síðan þegar þeir kveiktu á hitanum þá vorum við heppin að vera heima. Þvílík læti! Það er ventill á ofninum í svefnherberginu sem flautaði gufu og við rétt náður að bjarga sjónvarpssnúrunum frá því að bráðna fastar við stofuofninn.

Ég er annars farin að fatta það betur að allt heldur áfram án mín heima. Litli frændi minn Baltasar er víst komin með 4 tennur og er farin að standa upp á milli þess sem hann skríður eins og herforingi. Eina vandamálið er víst að hann nær núna ofan í blómapottinn og honum finnst moldin góð.
Læt fylgja 2 myndir af guttunum mínum sem Erlen sendi mér.

Framundan er svo próf á mánudaginn og svo koma Erlen og Kiddi 3 nóv. Ég hlakka svo til að fá þau hingað. Hver veit nema að ég skelli mér í verslunargírinn með þeim og byrji að kaupa jólagjafir. Það er allavega farið að selja jóladót í Target og Gummi er farin að flauta jólalög.

Annars á amma mín afmæli í dag og vil ég bara enda á því að óska henni aftur til hamingju með daginn.

... þannig að núna sitjum við Gummi hérna í sitt hvorri tölvunni og með sjónvarpið líka í gangi. Ætli þetta endi með því að við tölum saman á msn-inu hérna heima? Kemur í ljós:)

Ásdís og Doddi komu í heimsókn til okkar núna um helgina eins og ég minntist á fyrr. Þau komu á fimmtudaginn og fóru núna í kvöld. Við vorum mjög dugleg að fara út og sáum meira af NY á þessum 5 dögum heldur en alla hina dagana samanlagt.

Við fórum á föstudaginn í Kínahverfið, Soho og Tribeca. Ætluðum líka í Litlu Ítalíu en okkur tókst að labba fram hjá henni. Það var alveg hrikalega kalt þann daginn þannig að við löbbuðum frekar rösklega og ég var gjörsamlega búin í löppunum í lok dagsins. Við enduðum á því að fara á MOMA safnið (The Museum of Modern Art) og þrátt fyrir að við værum þar í dágóðan tíma náðum við einungis að sjá hluta af safninu þannig að við munum reyna að fara þangað fljótlega aftur. Um kvöldið fórum við svo á The Improv Comedy Club þar sem við Ásdís fengum allra verstu strawberry daiquiri sem gerðir hafa verið. Hverjum dettur í hug að nota niðursoðin jarðaber í daiquiri?

Á laugardaginn byrjuðum við daginn á staðgóðum hádegismat sem samanstóð af amerískum pönnukökum, kanilsnúðum og beikoni. Síðan fórum við Ásdís í smá verslunarleiðangur á meðan strákarnir spiluðu pool. H&M stóð fyrir sínu en ekki voru keyptir skór í þessari verslunarferð. Um kvöldið elduðum við Ásdís enchiladas og bökuðum brownies og síðan átum við öll svo hrikalega yfir okkur. Enduðum kvöldið svo með póker.

Á sunnudaginn fórum við á Broadway að sjá Spamalot sem er leikrit sem byggt er á verkum Monty Python. Gummi vill taka það fram að þetta sé eitt skemmtilegasta leikrit sem að við höfum séð þannig að Kolla, þú átt endilega að fara að sjá þetta þegar þú kemur næst Eftir það fórum við svo á Sushi Samba en við fórum einmitt þangað með Dodda, Ásdísi, Kollu og Steven þegar við vorum hérna í fyrra og maturinn var alveg jafn góður, nammi nammi nammmmmmmmm.

Í morgun fórum við Ásdís svo í Sex and the City túr þar sem að við fórum í rútu á milli staða í borginni þar sem atriðin voru tekin upp. Túrgædinn var einmitt svo indæll að benda okkur á búð sem að selur merkjavörur með mjög góðum afslætti og þó að við næðum ekki að fara þangað í dag þá er nokkuð ljóst að ég dreg Gumma með mér þangað við fyrsta tækifæri. Ég verð nefnilega að fara að skoða hana áður en Erlen og Kiddi koma. Þau eru nefnilega búin að bóka miða og munu koma hingað til okkar 3. nóvember, vei vei vei

Það er rosalega gaman að lesa kommentin frá ykkur og sjá hverjir lesa bloggið okkar svo endilega haldið áfram að kommenta.